My Verbindig zur Schiff-Fahrt Als glaine Bueb, bi-ni-dozuemool mit mym Grossbabbe (ehemalige Zöllner) ebedie im Rhyhafe umegstiflet. Ä het mir d’Laufkatze zur Entlaadig vo Schiff erglärt. Uf dr Ussichtsterrasse het är mir viel über dr Rhy verzellt, e huffe ha-n-i laider widder vergässe. Au d’Usstellig Unsere Wäg zum Meer simmer ebbe die go gnaisse.

My erschti grösseri Rhyfahrt ha-n-i mit 12 während de Summerferie mit myne Eltere no Rotterdam gmacht. Spöter, ich bi scho in dr Rölleli gsi, hani ammygs s’Velo vom Babbe gnoh und bi in Rhyhafe oder in Hafe z’Blätzbums gfahre und ha zugluegt wie deert gschafft wird. Dorum het my erste Voordraag in dr Schuel au s’Thema „Dr Rhyhafe vo Basel“ gha. Im-en-e wittere ha-n-i s Thema „Schleppschiff Vogel Griff“ gwählt.

Drno isch es e bitzli ruhiger worde mit dr Schiffahrt. Mit 19 ha-n-i mit mym Getti und em Gschäftsfierer vo dr Aquatravel e Schiffstransport, e Kanalferieschiffli, vo Lyon bis no Aigues-Mortes uf dr Rhône derfe mitmache.

E baar Johr spöter bini mit minere Frau und mit emene befründete Päärli uf em Canal du Midi 2 Wuche als Schipper unterwägs gsi.

Au in de folgende Johr sin mer in de Ferie mindestens aimool uf e Shiffsusflug.

Die letschti Schiffsreis han ich jo das Johr im Summer, vo Basel us via Nijmegen, Antwerpen, Gent, Amsterdaam uf d’Insle Texel und via d’Ijsel wider uf e Rhy und Zzrugg uf Basel, duregfiert.

Es wird sicher nid die letschti si.